Përgjegjësi Sociale

Përgjegjësi Sociale

Përgjegjësia sociale është një vlerë e shtuar e Grupit Financiar Eurosig–Insig-UBA. Falë angazhimit dhe kujdesit të vazhdueshëm të Presidentit, Z. Kadri Morinaj, subjektet e Grupit janë të angazhuara për të maksimizuar ndikimin pozitiv në shoqëri dhe mjedisin ku ushtrojnë veprimtarinë e tyre. Një vëmendje të veçantë Grupi Eurosig-INSIG-UBA dhe Presidenti Morinaj kanë ndaj mjedisit kulturor, artistik, mediatik, ndaj shtresave në nevojë etj.

Veprimtaritë kryesore në kuadër të përgjegjësisë sociale dhe promovimit të vlerave të Grupit Financiar Eurosig-INSIG-UBA janë:

Grupi Eurosig-Insig-UBA nënshkroi një marrëveshje bashkëpunimi me Universitetin Epoka, me qëllim rritjen e bashkëpunimit për zhvillimin e praktikave mësimore të studentëve dhe shkëmbimin e eksperiencave të përbashkëta. Ky bashkëpunim synon mbështetjen e zhvillimeve të qëndrueshme të ekonomisë, promovimin e punimeve shkencore për shërbimet financiare, sjelljen e ideve inovatore në shërbim të politikave të zhvillimit për një vendimmarrje të mbështetur në punime kërkimore dhe shkencore etj.

Grupi Eurosig-Insig-UBA akordoi 30 000 Euro në ndihmë të familjeve të dëmtuara nga tërmetet në Turqi. Presidenti i Grupit, Z. Kadri Morinaj, shprehu keqardhje maksimale për situatën e krijuar dhe uroj rikuperim të shpejtë të familjeve të dëmtuara.

 

Mbështetje për trajnimin e studentëve të Universitetit Epoka me njohuri për industrinë e sigurimeve (24 janar-18 shkurt 2023). Në ceremoninë përmbyllëse të trajnimit morën pjesë Presidenti i Grupit, Z.Kadri Morinaj, Rektori i Universitetit Epoka, Prof.Dr.Ahmet Ostaz, Menaxhmenti i Grupit, si dhe pedagogë e studentë të Universitetit Epoka. Trajnimi i ofruar nga menaxherë të lartë të Eurosig ishte një mundësi e shkëlqyer për studentët, për të patur një qasje teorike mbi sigurimet dhe mundësitë që ofron tregu i punës i industrisë së sigurimeve. Grupi Eurosig dha 5 çmime për studentët më të mirë në trajnim dhe akordoi bursa të plota Masteri për disa studentë ekselentë. Presidenti i Grupit, Z. Morinaj, mbajti një fjalim inkurajues për studentët, duke evidentuar momentet kryesore në rrugëtimin e tij në fushën e biznesit. Ai theksoi se “dyert e Grupit Eurosig janë të hapura për çdo student që ka dëshirë të punojë dhe të rritet profesionalisht”.

Mbështetje për Konferencën Ndërkombëtare “Sfidat në Ballkanin Perëndimor: Infrastruktura dhe Zhvillimi në Rajon”, të organizuar nga Universiteti EPOKA, së bashku me Këshillin Global të Dekanëve të Inxhinierisë (GEDC) dhe Federatën Ndërkombëtare të Shoqërive të Edukimit Inxhinierik (IFEES). Akademikë, drejtues të industrive, studiues, profesorë, doktorë, organe qeveritare dhe organizata joqeveritare morën pjesë në këtë konferencë ndërkombëtare inovative. Në një panel drejtuesish kompanish ndërkombëtare, ishte i ftuar edhe Presidenti i Grupit Eurosig-Insig-UBA, Z. Kadri Morinaj, i cili shpjegoi sfidat dhe nevojën e zhvillimit të tregut, veçanërisht të industrisë së sigurimeve. Z. Morinaj shprehu shqetësimin e tij edhe për largimin e trurit dhe fuqisë punëtore nga Shqipëria.

Grupi Eurosig-Insig-UBA shtroi një darkë madhështore te Bar Restorant “Piazza” për pjesëmarrësit nga shumë vende të botës në Konferencën Ndërkombëtare “Sfidat në Ballkanin Perëndimor: Infrastruktura dhe Zhvillimi në Rajon”. Gjatë mbrëmjes, Presidenti i Grupit, Z. Kadri Morinaj, u vlerësua me një çmim të veçantë nga Dr.Ahmet Oztas (Rektor i Universitetit Epoka), Dr.Sunil Maharaj (President i GEDC) dhe Dr.Hans Hoyer (Drejtor Ekzekutiv i IFEES dhe GEDC) për kontributin, bujarinë dhe vlerat kombëtare të treguara gjatë dy ditëve të konferencës. Gjithashtu, z. Morinaj u vlerësua për mikpritjen nga Dr.Michael Milligan, President i ABET Engineering Accreditor – SHBA, nga Paul Gilbert, CEO of Quanser – Kanada etj.

Mbështetje e Festivalit Folklorik “Hasi Jehon” në organizimin e Edicionit të 34-ët, i cili u mbajt në fshatin Gjonaj, në Kosovë. Presidenti i Grupit, Z. Kadri Morinaj, përshëndeti këtë festival dhe konfirmoi mbështetjen edhe për vitet e ardhshme.

Grupi Eurosig-Insig-UBA mundësoi organizimin e 5-vjetorit të krijimit të Këshillit të Ambasadorëve Shqiptarë. Në këtë event mori pjesë edhe Delegacioni i Këshillit të Ambasadorëve Amerikanë. Presidenti i Grupit, Z. Kadri Morinaj, u nderua nga Këshilli i Ambasadorëve Amerikanë me Medaljen “Benjamin Franklin – Ambasadori i Parë Amerikan”, për mikpritjen e veçantë dhe të ngrohtë në Shqipëri. Zoti Morinaj i siguroi Ambasadorët nga SHBA që Dyert e Tij do të jenë gjithmonë të hapura për ta.

Më 1 qershor, Ditën e Fëmijëve, Grupi Eurosig-Insig-UBA bëri të lumtur mbi 300 fëmijë në qytetin e Librazhdit. Me iniciativën e Klark Morinaj, në këtë qytet u organizua një festë e madhe për të gjithë fëmijët, me lojëra, animatorë dhe mjaft aktivitete të tjera. Ata do ta kujtojnë gjatë atmosferën festive që u krijua. Për fëmijët pjesëmarrës u shpërndanë edhe dhurata. Ata meritojnë më të mirat e kësaj bote, pasi janë e ardhmja jonë.

Grupi Eurosig-Insig-UBA mbështeti nismën e violinistit me famë botërore Olen Cesari për Festivalin e Porto Palermos, i organizuar çdo fundjavë nga 15 korriku deri më 15 gusht, në kalanë e Porto Palermos. Ky festival synon të kthehet në një traditë verore, duke mbledhur çdo vit vizitorë dhe dashamirës të artit shqiptar dhe të huaj. Meqenëse kalaja e Porto Palermos ka vlera të veçanta historike, festivali synon të ringjallë këtë perlë në rivierën shqiptare. Festivali shërben jo vetëm si një festë e muzikës dhe artit, por edhe si një mënyrë për të krijuar ndërgjegjësim për çështje të rëndësishme mjedisore dhe të qëndrueshmërisë.

Grupi Eurosig-Insig-UBA, në kuadër të Tetorit Rozë mbështeti simpoziumin “Luftojmë së Bashku Kancerin e Gjirit”, të organizuar nga Long Life Turkish Clinic. Qëllimi i simpoziumit ishte ndërgjegjësimi i nënave, motrave dhe të gjitha grave që të kujdesen më shumë për shëndetin e tyre, veçanërisht të kryejnë kontrolle të vazhdueshme për parandalimin e kancerit të gjirit.

Në Ditën e Solidaritetit dhe Aktivizmit Social, organizuar nga rrjeti AS@N, Grupi Eurosig-Insig-UBA u krijoi mundësinë shumë të rinjve të njihen me kompanitë e Grupit, duke punuar dhe duke marrë eksperiencë pranë ambienteve tona. Atyre iu akordua edhe një pagesë ditore. Ndjehemi të nderuar që iu bashkuam kësaj nisme, duke u solidarizuar me të rinjtë për të krijuar një zë të bashkuar për aktivizmin rinor.

Lidhja e Shkrimtarëve dhe Artistëve të Kukësit organizoi edicionin e tretë letrar “Në prehër të Gjalicës”, me shkrimtarë dhe artistë nga shumë treva të Shqipërisë e Kosovës. Për të dytin vit radhazi ky aktivitet u mbështet financiarisht nga Grupi Eurosig-Insig-UBA, me qëllim që shkrimtarët dhe artistët t’i japin më shumë vlerë këtij qyteti me tradita dhe kontribute të mëdha në shoqërinë shqiptare. Pjesëmarrësit falënderuan Presidentin e Grupit, Z. Kadri Morinaj, i cili u është gjendur gjithnjë pranë intelektualëve të Kukësit.

Presidenti i Grupit Eurosig-Insig-UBA, Z. Kadri Morinaj, mori pjesë në inaugurimin e rindërtimit të xhamisë së vjetër në “Kodër Hani” të Pukës. Z. Morinaj kontribuoi në rindërtimin e kësaj xhamie me një histori 400-vjeçare, duke i rikthyer këtij objekti fetar rëndësinë e veçantë për këtë zonë dhe historinë e saj.

Më pas, Z. Morinaj, së bashku me arkitektin e njohur, Z. Artan Shkreli, dhe me Kryetarin e Bashkisë Pukë, Z. Rrok Dodaj, vizituan Shtëpinë Muze “Migjeni”. Nisur nga kushtet jo të mira të këtij muzeu, duke çmuar rëndësinë dhe vlerat e tij për identitetin tonë kombëtar, Z. Morinaj mori përsipër të mbështesë rikonstruksionin e muzeut, për ta transformuar në një nga destinacionet kryesore dhe më të vizitueshme në Pukë, nga turistë vendas dhe të huaj.

Grupi Eurosig-Insig-UBA organizoi një festë shumë të bukur dhe shpërndau dhurata për dhjetëra fëmijë jetimë, në mesin e të cilëve ishin edhe fëmijë të punonjësve të Policisë të rënë në detyrë. Presidenti i Grupit Eurosig, Z. Kadri Morinaj, u kujdes personalisht që për këta fëmijë të shtrohej një drekë dinjitoze tek Bar Restorant “Piazza”, duke kënaqur secilin prej tyre edhe me dhurata. Në këtë festë të fundvitit ishin të pranishëm edhe Ministri i Brendshëm, Z. Taulant Balla, Drejtori i Përgjithshëm i Policisë, Z. Muhamet Rrumbullaku, si dhe familjarë të policëve të rënë në detyrë. Z. Morinaj falënderoi këta fëmijë që u bënë pjesë e festës dhe tregoi gatishmëri për t’i përkrahur, në momentet e tyre të vështira.

Presidenti i Grupit Eurosig-Insig-UBA, Z. Kadri Morinaj, shtroi një drekë festive në Bar Restorant “Piazza” për fëmijët e Ushtarakëve, e cila u shoqërua edhe me dhurata për çdo fëmijë. Shoqata e Ushtarakëve të Shqipërisë i akordoi një trofe mirënjohjeje Z. Morinaj për mbështetjen e vazhdueshme.

Grupi Eurosig-Insig-UBA mundësoi dërgimin e Teatrit Shëtitës “Çajupi” në qytetin e Krumës, në Has, me qëllim argëtimin e fëmijëve në ditët festive para ndërrimit të viteve. Teatri i kryesuar nga drejtori, z. Kiço Londo, realizoi një shfaqje shumë të bukur, e cila u ndoq nga shumë fëmijë në ambientet e Pallatit të Kulturës “Pjetër Bogdani”. Grupi Eurosig mori shumë falënderime për mbështetjen e vazhdueshme për Hasin, vendin e Pjetër Bogdanit, statuja e të cilit është lartësuar në qendër të qytetit të Krumës me mbështetjen e Presidentit të Grupit, Z. Kadri Morinaj.

Si çdo vit, Grupi Eurosig-Insig-UBA u bë Sponsor Gjeneral i Festivalit të 62-të të Këngës në RTSH. Në këtë edicion u dhanë disa çmime, 5 prej të cilave u ndanë nga juria profesioniste, ndërsa publiku zgjodhi me votim artisten Besa Kokëdhima, si këngë përfaqësuese e vendit tonë në Eurovizion.

Veprimtari të shumta në kuadër të përgjegjësisë sociale dhe promovimit të vlerave të Eurosig u zhvilluan edhe në periudhën e parë të vitit 2024, ndër të cilat, evidentojmë:

Grupi Eurosig-Insig-UBA mbështeti eventin në nderim të 100 vjetorit të artistit të madh “Nderi i Kombit”, zotit Kadri ROSHI. Në këtë event, nëpërmjet një dokumentari, u kujtua mjeshtri i skenës dhe kinematografisë shqiptare, duke sjellë ndërmend veprën e tij artistike si monument kulture. Gjithashtu, Grupi Eurosig mbështeti edhe promovimin e librit “Në jetët e të tjerëve”, ku personalitete të artit, medias dhe politikës shqiptare kanë ndarë në libër kujtimet e tyre me Kadri Roshin. Në praninë e shumë personaliteteve në këtë event, Grupi Eurosig mori falënderime të ngrohta për mbështetjen e vazhdueshme.

Edhe pse në ditë të ftohta të dimrit, teatri shëtitës për fëmijë vijoi shfaqjet në shumë qytete të vendit. Mbështetur nga Grupi Eurosig-Insig-UBA, ndalesat e rradhës ishin në Pukë, Fushë Arrëz dhe Librazhd, ku për fëmijët u dha shfaqja “Fuqia e dëshirave”. Teatri shëtitës për fëmijë do vijojë të japë shfaqje edhe në qytete të tjera.

Duke sjellë në skenë një komedi shumë të bukur të titulluar “Zonja e Bujtinës”, të autorit italian Carlo Goldoni, me regjinë e Suela Bakos dhe nën kujdesin e mësueses Orilda Kalami, nxënësit jo vetëm shijuan aventurat e personazheve dhe ngjarjeve në teatër, por zhvilluan dhe aftësitë e tyre krijuese. Grupi Eurosig-Insig-UBA, me mbështetjen e dhënë për realizimin e kësaj shfaqjeje, i frymëzoi këta të rinj të shijojnë fuqinë e artit të teatrit për të motivuar imagjinatën, miqësinë dhe guximin e tyre.

Qindra pako me ushqime u shpërndanë në muajn e shenjtë të Ramazanit nga Grupi Eurosig-Insig-UBA dhe Alesia sh.p.k. në Kukës, Pukë, Has dhe Fushë Arrëz. Grupi Eurosig dhe Alesia sh.p.k. u erdhën në ndihmë me ushqime shumë familjeve në vështirësi ekonomike, duke mos bërë dallime sipas besimeve fetare, por sipas pamundësive ekonomike. Urojmë mirëqenie për të gjithë shqiptarët dhe agjërim të pranuar për besimtarët myslimanë.

Olen Cesari, violinist i jashtëzakonshëm me famë botërore, organizoi tre ditë koncert gjigand në Shqipëri. I shoqëruar nga Internacional Clandestinë Orhestra, së bashku me Sergio Cammariere, Marsela Çibukaj, Carlos Paz dhe Gaz Paja, violinisti i njohur u kthye pas dy vitesh në Tiranë për t’ju dhuruar artëdashësve disa netë të paharrueshme në Pallatin e Kongreseve. Grupi Eurosig-Insig-UBA mbështeti këtë koncert me qëllim që artistët të motivohen dhe qytetarët shqiptarë të shijojnë magjinë e artit në këtë fillim vere.

Grupi Eurosig-Insig mori pjesë në Panairin e Karrierës me qëllim nxitjen e gatishmërisë dhe përgatitjen për tregun e punës të studentëve të Universitetit Western Balkans, një ndër universitetet më prestigjioze në vend. Nisur nga interesi dhe dëshira e lartë e studentëve, atyre iu ofrua mundësia për të qenë pjesë e shoqërive Eurosig dhe Insig.

Dëshiron të konsultohesh me një ekspert i sigurimit?

+355 69 20 61 994

Menu

Kryefaqe
Shërbimet
Rreth Nesh
Blog
Kontakt

Politikat

Privatesia
Cookie
FAQ

Zyrat Qëndrore

Copyright 2024 – INSIG JETE – Të gjitha të drejtat e rezervuara.

Go To Top
logo